Parakalim i gabuar/ “Benz-i” me shpejtësi përplas makinën e familjes, 4 anëtarët në luftë për jetën

Një aksident tragjik është shënuar në aksin Berat-Dimal.

Mësohet se një mjet furgon mallrash, tip “Benz”, me targa AA 297 TH, ka devijuar në përpjekje për të parakaluar.

Si pasojë e shpejtësisë të lartë, ai është përplasur me një automjet tip “Hyundai”, me targa AA 993 XI, me të cilin udhëtonte një familje e tërë.

Nga aksidenti janë plagosur katër pjesëtarët e familjes Bilbili: Resmi Bilbili që ishte drejtuesi i Hundait, bashkëshortja e tij Gjenovefa dhe dy fëmijët e çiftit: djali Riza dhe vajza Pamela.

Drejtuesi furgonit, 30-vjeçari Valter Belishaku është shoqëruar në polici, ku po jep edhe deklarimet në lidhje me aksidentin e rëndë. 4 pjesëtarët e familjes Bilbili, të gjithë të plagosur rëndë, janë transportuar me ambulanca me urgjencë drejt Spitalit Rajonal Berat.

Burimet spitalore bëjnë me dije se pjesëtarët e familjes Bilbili janë në terapi intensive në Repartin e Reanimacionit në Spitalin Rajonal Berat. Në vendngjarje kanë mbërritur forca të shumta të policisë rrugore dhe ekspertë, që po kryejnë këqyrjen e vendit të ngjarjes, për të zbuluar dinamikën e aksidentit të rëndë.

Burimet e para policore nga vendngjarja pohojnë se dyshohet që shkak për aksidentit e rëndë ka qenë lagështira në rrugë, shpejtësia e drejtuesit të furgonit dhe parakalimi i tij i gabuar.