Pas deklaratës së kryeministrit Edi Rama i cili u shpreh se nuk do të ketë më dialog me opozitën në praninë e të huajve, ka reaguar dhe lideri i Partisë Demokratike Lulzim Basha.
I pyetur nga gazetarët nëse e pranon dialogun me qeverinë jo në gjuhë angleze dhe nëse amendamentet kushtetuese të PD janë të panegociueshme, Basha u shpreh se është gati të ulet në diskutim dhe të pranojë propozimet e socialistëve, nëse sipas tij, ato janë të vlefshme.
“Pa diskutim që ne ulemi për të çuar përpara plotësimin e këtyre amendamenteve kushtetuese. Nuk shkojmë aty me qarkun e pushkës për të thënë firmosni tani. Nëse kanë diçka të vlefshme për të shtuar, le ta shtojnë, nëse kanë pyetje, le të pyesin. Ama këtë do ta zhvillojmë në sytë e gjithë shqiptarëve.
Për gjithçka që bën vettingun më të fortë, ne jemi gati. Edhe nëse masakra zgjedhore nuk do të kishte penguar ardhjen e PD në pushtet, mundësia që ne të ndryshonim vetëm Kushtetutën, do të ishte e vogël. Një vendi që kërkon të bëhet anëtar i BE, nuk i takon që një parti ta ndryshojë Kushtetutën, e vetme. Pra, edhe nëse do i kishim votat, prapë do të shkonim te PS, që t’iu thonim ‘ejani ta bëjmë bashkë’.
Të krijojmë një sistem, që njerëzit të vendosin. Ky është mekanizmi bazë i demokracisë. Vetëm me këtë mekanizëm pasuritë e panumërta të Shqipërisë mund të kthehen në të mirë të shqiptarëve dhe jo në luks të disa njerëzve. Ky është një vend i pasur në mes të Evropës që është vjedhur veçanërisht në këto 8 vite”, u shpreh Basha.
