“Ne nuk kemi një krizë energjie” Ekonomisti ‘zbërthen’ paralajmërimin e Ramës: Alarmi ishte për arsye tjetër

Pas paralajmërimit që bëri kryeministri Edi Rama dy ditë më parë në lidhje me krizën energjitike, ka reaguar dhe ekonomisti Dritan Shano.

“Ne nuk kemi një krizë energjetike, por situatën tonë të përhershme, ka apo nuk ka reshje. Ai që lëviz çmimin e energjisë për konsumatorin është ERE dhe jo kryeministri, aq më pak nëpërmjet një konference për shtyp. Më shumë sesa një krizë energjetike, kjo është një krizë menaxhimi. Kjo ka të bëjë drejtpërdrejtë me njerëzit e emëruar nga qeveria në bordet e kompanive publike. Shumë shpesh, ata njerëz nuk kanë asnjë lidhje me menaxhimin.

Nuk ka një krizë energjetike sa i përket Shqipërisë. Kriza në botë ka prekur ato shtete që bazojnë prodhimin e energjisë elektrike përmes gazit. Këto mallra kanë njohur një rritje të madhe që kanë shtyrë edhe rritjen e çmimit të energjisë. Ne do të përballemi me këtë rritje kur të importojmë” ,tha ai për ‘Ditari’.

Ekonomisti theksoi se kryeministri duhet të zgjedhë nëse do të mbështesë qytetarët apo PPP-të.

“Alarmi i kryeministrit mund të lidhet vetëm me një situatë: Kur ai ka vendosur që paratë e buxhetit do t’i çojë për PPP-të e vjetra dhe ato të rejat që ai ka ndërmend dhe nuk ka ndërmend të harxhojë asnjë kokërr leku për të amortizuar, kalimin e kësaj situate të vështirë nëse nuk ka reshje. Kryeministri duhet të zgjedhë nëse duhet t’u japë mbështetje qytetarëve apo PPP-ve?”, u shpreh Shano.