Mbyllet protesta/ Qytetarët kanë 4 kërkesa për qeverinë, por ja kur do të mblidhen sërish

Mbyllet protesta e mbajtur sot përpara kryeministrisë kundër rritjes së çmimeve të energjisë elektrike, ushqimeve bazë të shportës, si dhe naftës e gazit.

Tubimi nisi në orën 17:00 dhe zgjati mbi 60 minuta.

Ajo ishte e organizuar nga qytetarët e thjeshtë dhe politikanët nuk ishin të mirëpritur.

Protestuesit kanë mbajtur fjalimet e tyre, ku në thelb ishte marrja e masave për moslejimin e ngritjes së çmimeve.

Në fund, një nga protestuestit renditi katër kërkesa për qeverinë:

-Ne propozojmë heqjen e TVSH për ushqimet e shportës.

-Kërkojmë uljen e TVSH-së në masën 10% të çmimit të energjisë për bizneset e vogëla dhe familjet.

-Heqjen e taksës së qarklullimit në naftë.

-Heqjen e akcizës së gazit.

Fjalën e mori dhe aktivisti Adriatik Lapaj, i cili lajmëroi se ata do të mblidhen sërish ditën e hënë në orën 17:00.

“Ditën e hënë në orën 5 do jemi këtu përsëri. Ndoshta bëhemi më shumë se sot ditën e hënë. Ku i dihet”, u shpreh Adriatik Lapaj.