Komiteti i Ekspertëve merr nesër vendimin nëse do t’i jepet “drita jeshile” dozës së tretë

Ministrja e Shëndetësisë Ogerta Manastriliu ka deklaruar para gazetarëve se Komiteti i Imunizimit ka rekomanduar futjen në protokolle të dozës së tretë të vaksinës për Covid-19.

Manastirliu njoftoi se ky komitet ka këshilluar jo vetëm dozën e tretë, por edhe uljen e fashës së moshës për vaksinim. Pra, rekomandohet vaksinimi i personave mbi moshën 16 vjeç dhe i atyre mbi 12 vjeç në qoftë se kanë probleme shëndetësore.

“Është mbledhur Komiteti Teknik i Vaksinimit përgjatë fundjavës së shkuar, të cilat kanë diskutuar dhe kanë rekomanduar vendosjen në protokolle të dozës së tretë ose dozës booster, kanë rekomanduar edhe uljen e fashës së moshës për vaksinim, plus 16 vjeç. Kanë rekomanduar edhe vaksinimin plus 12 vjeç por vetëm për ata fëmijë që kanë problematika  këto rekomandime që kanë dalë nga komiteti i vaksinimit do të diskutohen ditën e nesërme nga Komiteti Teknik i Ekspertëve. Do të kemi edhe një njoftim për vendimet që do të marrë ky komitet.”

Tanimë pritet që Komiteti Teknik i Ekspertëve të mblidhet ditën e nesërme dhe të vendosë nëse rekomandimet e Komitetit të Imunizimit do të marrin dritën jeshile apo jo.

Pas marrjes së vendimit, ministrja Manastirliu njoftoi se vendimet do t’i komunikohen publikut.