Qindra anëtarë të Partisë Demokratike në Shkodër i kanë dhuruar një pritje entuziaste ish-kryeministrit Sali Berisha në qytetin verior.
Në takimin e rradhës në kuadrin e turit që e ka pagëzuar si “Foltorja”, Berisha u shpreh se Shkodra ka martirë dhe shenjtorë më shumë se të tëra qytetet e tjera në qëndresën kundër regjimit komunist.
Ish-Kryeministri Sali Berisha akuzoi qeverinë Rama se ka diskriminuar Shkodrën dhe gjithë veriun e vendit përsa i takon investimeve.
Aitha se regjimi i Edi Ramës burgosi në vitin 2015, 38 mijë shqiptarë për faturat e energjisë dhe ujit, numri më i lartë i të arrestuarve që ka njohur vendi.
Sipas ish-kryeministrit, nën regjimin e Ramës, Shqipëria është kthyer në delen e zezë të Ballkanit.
“Jemi 8 vite në vendnumuro. Sot jemi më afër me Serbinë se me Gjermaninë apo me vendet e BE-së. Çfarë bëri ky Kryeministër? Për t´iu kundërvënë nismës së Berlinit, nisi “Open Balkan”.
“Ballkani i Hapur është nisma e sherrit, solli tanket në kufirin me Kosovën”, tha Berisha.
Ish-Kryeministri Sali Berisha u shpreh se megjithë keqqeverisjen, varfërinë, rritjen e papunësisë, Edi Rama nisi mandatin e tretë.
“Dhe padyshim këtu kemi edhe dështimin e opozitës, e cila nga viti në vit dështoi në nismat e saj. Çdo marrëveshje që Lulzim Basha ka bërë me Edi Ramën ka fituar ky i fundit, atëherë unë po i them që këtu: hiqni dorë nga marrëveshjet pa miratimin e Këshillit Kombëtar të PD. Ne s´mund të shkojmë nga dështimi në dështim”, tha Berisha duke “shigjetuar” kështu dhe liderin demokrat.
