Deputetja e Partisë Demokratike për qarkun e Lezhës, Elda Hoti rrezikon të humbasë mandatin.
Arsyeja është sepse ajo akuzohet se ka shkelur ligjin e dekriminalizimit.
Në Komisionin Qendror të Zgjedhjeve është depozituar nga Llesh Nikolli një ankesë në adresë të Hotit.
Mësohet se sipas dokumentave të dorëzuara bashkëngjitur, thuhet se është fshehur ndryshimi i emrit të babait të saj, nga David në Artan Hoti.
Ankimimi është bërë në adresë të kreut të KQZ Ilirjan Celibashi dhe më pas i është dorëzuar kryetares së Kuvendit Lindita Nikolla, drejtuesit të SPAK si edhe ambasadoreve të SHBA dhe BE në Tiranë.
‘Kjo deputete në vetëdeklarimin e saj ka fshehur ndryshimin e emrit të babait të saj nga David Hoti, në Artan Hoti. Ky ndryshim është bërë më datë 30 prill 2002 dhe kandidatja për deputete znj. Elda Hoti nuk e ka deklaruar në formularin e vetëdeklarimit. Duke fshehur këtë të dhënë te gjeniralitetet e saj, znj. deputete nuk mund të përfaqësojë komunitetit të saj në parlamentin shqiptar.
Kjo deputete përse e ka fshehur këtë ndryshim, e ka harruar, apo babai i saj ka pasur një të shkuar kriminale ku është dënuar për disa vepra të rënda penale, si ajo e trafikimit të lëndëve narkotike dhe trafikim të qenieve njerëzore” thuhet në akimin e dorëzuar në KQZ, ku pretendohet se deputetja Elda Hoti ka shkelur ligjin për dekriminalizimin dhe konsumuar vepër penale.
Ankesa e dorëzuar në KQZ, mban datën 13.10.2021, ndërsa deri më tani nuk kemi ende një vendim prej këtij institucioni. Kujtojmë se deputetja Elda Hoti mori mandatin nën siglën e PD, për këtë legjislaturë pas dorëheqjes se Mark Markut nga Qarku i Lezhës.
