Ish-kryeministri Sali Berisha sulmoi sot nga “Foltorja” në Peshkopi kryeministrin Edi Rama.
Gjithashtu ai nuk la pa sulmuar edhe kryetarin aktual të Partisë Demokratike Lulzim Basha.
Sipas Berishës, PD nuk ka lidership, ndërsa tregoi se në 2017 kishte menduar të rikthehej në krye të partisë.
Berisha tha se një ditë pasi u shpall non-grata nga SHBA për korrupsion masiv dhe ndikim në drejtësi, u ndje i habitur, pasi siç tha ai “askush s’më ka akuzuar kurrë për korrupsion”.
Pjesë nga deklarata e Berishës:
Ato daulle nuk janë dasme por beteje, do të përballesh me demokratët për të gjitha këto që ke bërë. PD është sot e goditur rëndë nga aktet e papërgjegjshme, nga udhëheqja pothuaj inekzistente e saj. Me datën 25 prill në darkë, çfarë tregonin sondazhet, tregonin se vetëm 19% e shqiptarëve që kanë votuar PD, kishin votuar për kryetarin. Pra ne shkuam në kutitë e votimit symbyllur, mirënjohje atyre që na votuan se ne drejtues nuk kishim. Në 2017-ën kur i kërkova dorëheqjen, ndoshta duhet të kisha vendosur të rikthehesha. Tre javë pas zgjedhjeve, DASH më shpalli mua person non-grata për të hyrë në SHBA. Unë ju them ju këtu, të nesërmen, e kam pyet veten, çfarë kam bërë unë që 8 vite pasi jam larguar nga çdo funksion drejtues, që kurrë në jetën time nuk kam patur asnjë akuzë për korrupsion dhe tani shpallem non-grata.
