Arrestohet në Rinas “milioneri” nga Dubai, Pakistani e kërkonte në të gjithë botën

Një 33-vjeçar banues në Dubai, ka rënë në prangat e policisë kufitare të Rinasit, për shkak se ndaj tij ishte lëshuar një urdhër arresti ndërkombëtar.

I arrestuari raportohet se është shtetasi me iniciale M. T., 33 vjeç. Ai do të ekstradohet drejt Pakistanit, shtet ky i cili kishte lëshuar ndaj tij edhe urdhrin e arrestit ndërkombëtar për veprën penale “Mashtrim publik duke përdorur arsye fetare”.

Njoftimi i policisë:

Rinas – Arrestohet me qëllim ekstradimi drejt Pakistanit, një shtetas i shpallur në kërkim ndërkombëtar.

Nga shërbimet e Komisariatit të Policisë Kufitare Rinas, si rezultat i shkëmbimit të informacionit me Interpol Tirana, është arrestuar shtetasi:

M. T., 33 vjeç, banues në Dubai.

Ky shtetas është ndaluar në hyrje të Republikës së Shqipërisë, pasi gjatë përpunimit të detajuar të të dhënave nga shërbimet e Policisë Kufitare Rinas, bazuar dhe në informacionet e shkëmbyera me Interpol Tirana, ka rezultuar person i shpallur në kërkim ndërkombëtar.

Në përfundim të veprimeve u bë arrestimi i tij, me qëllim ekstradimi drejt Pakistanit, pasi ishte shpallur në kërkim ndërkombëtar nga Interpol Pakistan, për veprën penale “Mashtrim publik duke përdorur arsye fetare”.