“Ai nuk e merrte dot atë detyrë as për 12 vjet” Shemçi Prençi tregon emrin e politikanit që vuri Ardi Veliun në krye të Policisë së Shtetit

Pas lajmit që po qarkullon në lidhje me shkarkimin nga detyra të Drejtorit të Përgjithshëm të Policisë së Shtetit Ardi Veliu, ka reaguar dhe Shemsi Prençi.

Ish-drejtuesi i lartë i Policisë u shpreh se emërimi i tij në këtë post të lartë ishtë turpi i uniformave blu.

I ftuar në programin “Breaking”, Prençi më pas zbuloi dhe mënyrën se si u katapultua Veliu në majën më të lartë të piramidës së Policisë së Shtetit. Ai shtoi se erdhi nga Vlora dhe u emërua nga ministri i Brendshëm i asaj kohe, Fatmir Xhafaj.

“Ardi Veliu pati një suport kriminal nga Vlora, nga ish-ministri Xhafaj, e më pas ai e katapultoi dhe e solli në Tiranë. Çudia më e madhe është se Rama i besoi dhe e vendosi në krye të saj. Fatmir Xhafaj, e vuri, nuk e ka njohur asnjëherë atë, ia ka rekomanduar vëllai i vet, që kishte njohje, ia serviri i vëllai Geron Xhafaj, i cili vuan dënimin në Itali. Pra e propozuan lidhjet e grupeve kriminale”, tha Prençi.

Ndërsa theksoi se nëse do të zbatohej ligji për Gradat në Policinë e Shtetit, Ardi Veliu nuk do t’i merrte gradat dhe të bëhej drejtor i Përgjithshëm i Policisë, as për 12 vite dhe jo siç u katapultua për 6 muaj në krye të policisë së shtetit, duke ardhur nga Vlora. Gjithashtu theksoi se ishte një fatkeqësi që u emërua ai në atë detyrë, pasi e futi policinë e shtetit në një qorrsokak.