A do të ketë një datë për pranimin e Ballkanit në BE? Ja si përgjigjet Angela Merkel

Kancelarja e Gjermanisë Angela Merkel ka mbështetur idenë se Bashkimia Europian nuk duhet të caktojë një datë për pranimin e vendeve të Ballkanit Perëndimor në këtë union.

Ajo ka vënë theksin më shumë në plotësimin e kushteve nga vendet që synojnë anëtarësimin.

Pas samitit në Slloveni, Merkel u shpreh gjatë një deklaratë për mediat se për të caktuar një datë, është e nevojshme të plotësohen të gjitha kushtet.

Zhbllokimi i negociatave të anëtarësimit nuk ndodhi as në samitin e përbashkët mes Bashkimit Europian dhe Ballkanit Perëndimor. Liderët e Unionit konfirmuan angazhimin ndaj rajonit, por nuk arritën të bindin Bullgarinë për të lejuar mbajtjen e konferencës së parë ndërqeveritare të BE-së me Shqipërinë dhe Maqedoninë e Veriut.

Vendet anëtare i bënë thirrje Sofjes që të sheshojnë mosmarrëveshjet me Shkupin dhe gjejnë zgjidhje të qëndrueshme për çështjet e hapura. Liderët e BE-së dhe ata të Ballkanit Perëndimor nënshkruan dhe një deklaratë të përbashkët, ku përshëndetet përkushtimi për t’i dhënë prioritet demokracisë, të drejtave dhe vlerave themelore si dhe sundimit të ligjit, po ashtu luftës ndaj korrupsionit dhe krimit të organizuar.

Ndër të tjera, u ofrua mbështetje për dialogun mes Kosovës dhe Serbisë, për të gjetur një marrëveshje finale për normalizimin e raporteve mes shteteve, gjë e cila shikohet kritike për stabilitetin dhe zhvillimin e të gjithë rajonit. Sa i përket pandemisë, u tha se ofrohet ndihmë në furnizimin me vaksina dhe pajisje të tjera mjekësore.