“Vetëm bërtiste, kishte vjellë” Ekzekutimi i 18-vjeçares në Kosovë, avokati i familjes zbardh dëshminë tronditëse të të pandehurit

Dalin detaje të reja nga vrasja e 18-vjeçares Marigona Osmani, ngjarje e ndodhur kjo pak kohë më parë në Ferizaj të Kosovës.

Ndërkohë, avokati i familjes së të ndjerës, Gazmend Rexhepi, ka zbardhur dëshminë e një prej të pandehurve, Arbër Sejdiut.

Ky i fundit ka rrëfyer orët e fundit të vajzës.

Sipas kësaj dëshmie, Osmani është dhunuar fizikisht dhe psikologjikisht gjatë dy ditëve të fundit përpara se të ndërronte jetë. Arbër Sejdiu thotë se 18-vjeçarja bërtiste dhe përpara se të humbte ndjenjat ka vjellë.

“Deklaratën e kam pa dje, ai ka thënë se vajza është rreh në mënyrë sistematike pothuajse gati çdo ditë…Deklarimi i tij është që dy ditët e fundit Marigona ka përjetuar dhunë fizike. Arbri ka qenë në dhomën tjetër ku ka nejt Marigona, dmth partneri i saj Dardan Krivaqa, dy ditët e fundit standard i ka shkaktu dhunë fizike dhe psikike. Ka pas shumë piskama, qysh e ka citu ai, nga ana e Marigonës dhe dhunë fizike. Thotë kur kemi hy në dhomë ka pas vjellje dhe në atë moment e kemi marrë e kemi çu në spital”, tha Rexhepi.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Ai tha se janë në pritje të raportit të autopsisë, ndërsa certifikata e vdekjes i është dorëzuar familjes.

“Autopsia nuk është dorëzuar akoma, çertifikatën e vdekjes ia kanë dhënë familjes do të thotë që është konstatuar vdekja e saj. Dje kam qenë në prokurori, e kam dorëzu autorizimin, prokuroria ka thënë se akoma nuk e kanë marrë raportin e autopsisë. Vetëm konstatimi që ka dal në publik nga Ministria e Drejtëisë, që është thënë për politraumë dhe thyerje. Prokuroria është në fazën e hetimeve na kanë thënë dhe na kanë premtu që për çdo shkresë do të njoftohet avokati dhe familja”, përfundoi ai.

Marigona Osmani dyshohet se ndërroi jetë pasi u dhunua për dy ditë. Ky rast është cilësuar si “vrasje e rëndë”, ndërsa në paraburgim po qëndrojnë ish-partneri i saj Dardan Krivaqa dhe Arbër Sejdiu. Të dy emra të njohur për organet e rendit.

Prokuroria Themelore e Ferizajt bëri me dije se mbi Krivaqën rëndonin një sërë veprash të ndryshme penale.