Udhëtimi i fundit/ Angela Merkel ‘zbarkon’ në Shqipëri më 14 shtator, detaje nga takimi i ‘gruas së hekurt’

Angela Merkel, “gruaja e hekurt” e Gjermanisë ka përzgjedhur kryeqytetin e Shqipërisë për të bënë një vizitë zyrtare më 14 shtator.

Sipas Albanian Post, Merkel do të vijë në vendin tonë për të takuar liderët e Ballkanit Perëndimor në kuadër të Procesit të Berlinit.

Në Tiranë do të jenë edhe liderë të tjerë të Ballkanit Perëndimor, në nivel kryeministrash.

Kancelarja Merkel është investuar të çojë më tej iniciativën e saj më të madhe politike që është “Procesi i Berlinit”. “Berlini zyrtar konsideron se Tirana dhe Rama për këto vite kanë relaksuar marrëdhëniet e vendeve të Ballkanit, veçanërisht me vizitat e ndërsjella në Tiranë dhe Beograd, të cilat ishin në fillim me armiqësi, por më pas me tone të relaksuara”, ka thënë burimi për AP.

Por kë parashikohet të takojë Merkel në Shqipëri?

Kujtojmë se kancelarja që po arrin gati 2 dekada në pushtet do të takohet në Tiranë me të gjithë liderët e Ballkanit Perëndimor, por jo me presidentin serb Aleksandër Vuçiç, për shkak të formatit të takimeve, ku do të takohen vetëm kryeministrat. Pas takimeve, pritet edhe një konferencë për mediat. Takimi i fundit i Merkel do të jetë me kryeministrin e Kosovës, Albin Kurti.