Në konferencën që mbajti sot ku ishin të pranishëm dhe demokratët, ish-kryeministri Sali Berisha u pyet dhe në lidhje me mekanizmin që do të përdorë për largimin e Lulzim Bashës nga drejtimi i partisë.
Ai zbuloi planin duke thënë se fillimisht do të mblidhen 1500 firma të delegatëve dhe do të thërritet Kuvendi Kombëtar, të cilit do ti kërkohet që të shprehet për vendimin e Bashës.
“Çfarë synon kjo foltore. Së pari, ndërgjegjësimin e çdo demokrati për situatën e krijuar, vjeljen e mendimit dhe qëndrimti të tij. Së dyti, do mblidhen firmat e 1500 delegatëve të Kuvendit Kombëtar. Pas mbledhjes së këtyre firmave, ne do thërrasim Kuvendin Kombëtar, që është forumi më i madh i partisë. Ne çdo gjë do e zgjidhim në mënyrën më demokratike. Ne do i kërkojmë Kuvendit Kombëtar që për vendimin të shprehet çdo anëtar i PD me referendum në mbarë Shqipërinë. Do ju thosha mos votoni kurrë humbës, me motivin që është më i mirë se ai. Humbësi në fitore nuk të çon. Të mos bëhet më ky gabim”, tha Berisha.
Nuk munguan as batutat, ku një demokrat e pyeti Berishën “nëse e dinte që Luli nuk dinte tabelën e shumëzimit?!”.
“Lapsus, ai ishte lapsus”-, u përgjigj me buzëqeshje Berisha.
Në përfundim të takimit me simpatizantët, Berisha u pyet nëse do t’i udhëheqë edhe njëherë demokratët si kryetar i PD.
“Se kush do ta udhëheqë PD-në do ta përcaktojnë demokratët dhe demokratet me vullnetin e tyre”, u shpreh ai.
