Policia ka ndëshkuar sot në Sarandë një subjekt pasi iu gjetën një sërë shkeljesh.
Lokali u konstatua duke ushtruar aktivitet pas orarit të përcaktuar, me muzikë dhe pa qenë i regjistruar në QKR.
Për këtë u ndëshkua dhe procedua administratori i subjektit me 1 milion lekë ndërsa gjoba pati dhe për 23 klientë.
Sipas uniformave blu, gjatë kontrolleve brenda në ambiente u konstatua dhe kanabis.
NJOFTIMI ZYRTAR I POLICISE
Vijojnë kontrollet nga Policia e Sarandës, për monitorimin e subjekteve që vijojnë aktivitetin pas orarit të përcaktuar për mbyllje.
U konstatua duke ushtruar aktivitetin pas orarit të përcaktuar duke qenë i paregjistruar në QKR, procedohet penalisht dhe ndëshkohet me masë administrative, administratori i një subjekti. Ndëshkohen me masë administrative edhe 23 klientë të subjektit. Sekustrohen pajisjet muzikore dhe një sasi e vogël kanabisi.
Shërbimet e Komisariatit të Policisë Sarandë vijojnë kontrollet për zbatimin e planit të masave për garantimin e rendit dhe qetësisë publike dhe monitorimin e lokaleve që vijojnë organizimet me muzikë pas orarit të përcaktuar për mbyllje, në kundërshtim me masat anticovid të vendosura nga organet kompetente. Në vijim të kontrolleve, shërbimet e Policisë kanë konstatuar në vendin e quajtur “Ura e Kranesë” 1 subjekt që po vijonte organizimin e aktivitetit me muzikë pas orarit të përcaktuar për mbyllje.
Në vijim të veprimeve specialistët e Hetimit të Krimeve në Komisariatin e Policisë Sarandë proceduan penalisht administratorin e subjektit shtetasin V(D). M., 45 vjeç, për veprat penale “Prishja e rendit dhe qetësisë publike” Ushtrimi pa lishencë i veprimtarive financiare”, dhe ”Prodhim dhe shitje lëndësh narkotike”.
Gjithashtu, është vendosur masa administrative 1.000.000 lekë, për administratorin e subjektit, për shkelje të orarit të përcaktuar në aktin normativ, dhe masa administrative 10.000, për 23 klientë, të konstatuar në subjekt. Gjatë kontrollit të ambientit, sherbimet e Policisë gjetën dhe sekuestruan një sasi të vogël lëndë narkotike kanabis. Drejtoria Vendore e Policisë Vlorë apelon për të gjithë administratorët e lokaleve që të respektojnë masat anticovid dhe orarin e përcaktuar për ushtrimin e aktivitetit.
