U tha filimisht se do të zhvillohej në gjirin e Lalëzit, por mesa duket destinacioni final ka qenë plazhi i Vilë-Bashtovës. “Ileghal Techno” quhet eventi që ka zgjatur deri në orët e para të mëngjesit, ku të rinjtë edhe pse në shkelje me orën policore kanë vijuar të festojnë pa asnjë shqetësim nga shteti.
“Në Shqipëri nuk ka burokraci të shëmtuar si në Itali. Këtu në Shqipëri është më qetë,”-tha një prej vajzave. Ndërkohë që nuk kanë munguar as lëndët narkotike. Gazetari i “ABC” Aldo Kozarja iu drejtua njërit prej organizatorëve të këtij aktiviteti, i cili i ka bërë me dije edhe detaje “sekrete” nga festa.
“Këto substanca narkotike, shumica i marrin nga vendet ku vijnë vetë. Përdoren lëndë narkotike të ndryshme, të drogave të forta, LSD, ketamina e shumë e shumë të tjera, kurse në Shqipëri mund të gjejmë diçka të vogël. Hyn nga vendet ku janë organizatorët e tjerë dhe hyjnë në kufirin shqiptar dhe konsumohet këtu. Gjithkush nga ne kërkon qetësinë e vet dhe nuk ka shqetësime as nga policia, nga shteti. Mund të konsumosh çfarë të duash, mund të rrish të bësh qejfit tënd,”- tha ai. Ndërsa ka dhënë edhe detaje sesi njoftojnë njëri-tjetrin për të marrë pjesë në festë: Ne njoftohemi përmes e-maile-ve. Nxjerrim lajmërimin dhe vendin ku do bëhet në Shqipëri, por nuk nxjerrim vendin ekzakt siç jemi këtu në plazhin e Vilë Bashtovës. Kjo për shkak se në rrjetet sociale apo në internet mund të bëhet shumë e dukshme dhe mund të kemi probleme me policinë apo me shtetin. Në mënyrë të fshehur gjithçka bëhet më mirë.
“Ileghal Techno” ose e njohur ndryshe si “Rave” është një festë e paligjshme, që zhvillohet në Romë prej kohësh. Aty marrin pjesë të rinj nga e gjithë Europa. Jo më larg se një muaj më parë, një 25 vjeçar, i lindur në Londër, me banim në veri të Italisë, mori pjesë në këtë festë por në mëngjes u gjet i vdekur në liqen nga overdoza. Në shumë shtete kjo festë është ilegale, por mesa duket në Shqipëri, nuk ndodh kështu.
