“PD do rikthehet në piedestal” Berisha paralajmëron Bashën: Do të marr çdo nismë ligjore, hyj në seli kur të dua

Duket se ish-kryeministri Sali Berisha është i vendosur deri në fund për të mos njohur vendimin e kryetarit të PD Lulzim Basha për ta përjashtuar atë nga grupi parlamentar.

Në mbarimin e seancës së parë të Kuvendit për këtë sesion, ai u prit nga qindra mbështetës jashtë godinës.

Berisha u shpreh se është pjesë e grupit të PD dhe mund të hyjë kur të dojë në selinë blu.

Ai gjithashtu shtoi se pakti Rama – Basha vazhdon, por nuk dha ndonjë koment nëse është vazhdimi i marrëveshjes së vitit 2017.

Pjesë nga fjala e Berishës:

Jam i vendosur për të mbrojtur interesin publik të qytetarëve dhe publikut. Për të denoncuar të gjitha aferat e këtij regjimi të kakistokracisë, regjim i cili ka zgjedhur shpifjen dhe trillimin për eleminimin e opozitarëve shqiptarë. Se çfarë date është pakti, do t’jua lë historianëve.; Ajo që ndodhi është një marrëveshje Rama-Basha në kurriz të zgjedhësve shqiptarë. Partia Demokratike është parti e të drejtave njerëzore, parti e interesit kombëtar. Jam i bindur se demokratët shqiptarë me vendosmëri do të dinë të vendosin PD në piedestal. Do të marr çdo nismë ligjore dhe statutore për rikthimin e PD në piedestal. Siç e shihni jashtë, jam anëtar i grupit të PD. Vendimi dhe kompromisi Basha-Rama ështëe nul, nuk ka mbështetje ligjore të pazareve prapa shpine. Në çdo kohë mund të hyj në selinë e PD. Do të jetë shumë e afërt dita kur PD të rifitojë të gjithë forcën dhe legjitimitetin për të shporrur një klikë sunduese të bazuar mbi krimin dhe drogën. Grupi ishte në krahun e vet, as është pyetur fare.