Gazetari Mentor Kikia ka reaguar pas situatës në Pogradec, ku një grup emigrantësh të paligjshëm të ndaluar nga policia shpërthyen derën e furgonit dhe u arratisën.
“Unë do ti ndihmoj klandestinët, le të më fusin në burg!”, shkruan ai, teksa edhe rrëfen historinë e tij si emigrant në Greqi.
REAGIMI I PLOTE:
Unë do ti ndihmoj klandestinët, le të më fusin në burg!
Unë jam ende i tronditur nga kjo video që tregon një grup klandestinësh që, pasi janë ndaluar nga policia, shpërthjenë derën e furgonit dhe marrin rrugët e qytetit të Pogradecit, nga frika mos i arrestojnë.
Unë e njoh atë vrap, e njoh atë panik, atë ikje nga sytë këmbët!
Në vitin 1992, me një grup studentësh, pas një udhëtimi 6 ditë e netë nëpër male, zbritëm në qytetin e parë grek që hasëm. Një sirenë policie na bëri që të shpërndahemi në muzg nëpër rrugë, të ikim, të fshihemi ku të mundemi, poshtë urës, në kazanë plehrash… u ribashkuam pas disa orësh. Pastaj vazhduam rrugësn sërish me këmbë… Befas një kamioçinë na ndaloi pranë. Më frikën në zemër, sërish ia dhamë vrapit. Por njeriu na ftoi të hipnim në karroceri. Ishte një fermer që na ndihmoi, bëmë rreth 60 km rrugë me të. Pastaj zbritën, ecëm sërish… takuam një tjetër grek që na mori në punë. Punuam tërë ditën për të e na dha vetëm një sanduiç për të ngrënbë. Pastaj takum një tjetër që na hapi shtëpinë për të fjetur…
Kishim mësuar vetëm fjalët bukë dhe ujë, që të kërkonin nëse do të mbeteshim në kushtet e urisë. Pas 2 muaj e gjysmë ne kishim bërë aq para sa të vazhdonim vitin e ri shkollor.
Këto histori shqiptare vazhdojnë ende. Por unë e kujtoj timen, saherë shikoj rrugëve të Shqipërisë shtetas të huaj që vijnë nga s’dihet se ku, ikn nuk dinë se ku, e kalojnë përmes rrugëve të vendit tonë. Disa prej tyre janë edhe këta që arratisen nga ky furgon trafikantësh.
Të ndihmosh një klandestin të kalojë kufirin, është vepër penale, padyshim.
Po ta ndihmosh atë kur ecën me këmbë rrugëve të Shqipërisë, a është vepër penale? Edhe në qoftë, unë do ta bëj. Do ta ndihmoj, duke ia lehtësuar një copë rrugë, ashtu siç dikur fermeri grek më ndihmoi mua. Edhe në më ndaloftë policia, do ta bëj. Jo për para, por për të kthyer mbrapsht nderin që më bënë mua dikur.
Nëse keni frikë se ju ndalon policia, atëherë jepuni ujë e ushqim, nëse i shikoni rrugëve të drobitur nga ecja e gjatë. Kjo nuk është vepër penale.
Nëse as këtë nuk e bëni, të paktën, mos i përbuzni, mos i përqeshni, sepse edhe ne jemi si ata. Kemi qenë, jemi, e me gjasë, do të jemi edhe për shumë kohë sirianë, afganë e libianë që enden rrugëve të botës.
