“Gjykim i padrejtë” Apeli la në fuqi vendimin me 2 vite burg, flet avokati i Adriatik Llallës

Ditën e sotme Gjykata e Apelit të Posaçëm ka vendosur të lërë në fuqi vendimin për të dënuar me dy vite burg ish-Kryeprokurorin Adriatik Lalla.

Gjithashtu në të përfshihet edhe 5 vite heqje e së drejtës për të ushtruar funksione publike si dhe konfiskim të pasurisë së tij.

Në një prononcim për mediat avokati Sokol Hazizaj bëri me dije se Llalla ndodhet në regjim spitalor, ndërsa e konsideroi vendimin si të padrejtë.

I pyetur mbi vendndodhjen e Adriatik Llallës, avokati tha: “Di që është në regjim spitalor. Gjykata e Shkallës së Parë dhe e Apelit ka bërë copy-paste konstatimet e organit hetimor”.

I pyetur nëse ka dijeni nëse ish-kryeprokurori ndodhet në një spital në Shqipëri, avokati tha: “Nuk kam komunikim për aspekte shëndetësore, vetëm proceduriale, penale”.

Sjellim në vëmendje që Adriatik Llalla u dënua me 2 vjet burg nga Gjykata e Shkallës së Parë për “fshehje dhe mosdeklarim të pasurisë”.

Disa prej pasurive të tij u sekuestruan dhe i kaluan shtetit. Po ashtu ish-kryeprokurorit iu morën  4 sipërfaqe toke, në total 22 mijë metra katrore dhe 1 apartament në Durrës.