“Gabohet rëndë kush mendon se është thjesht një aksion” Çuçi paralajmëron dhe lëshon thirrjen urgjente

Ministri i Brendshëm Bledi Çuçi ka lëshuar një tjetër paralajmërim të fortë.

Ai ka postuar një video ku shfaqen fadromat e IKMT duke shembur një godinë një katëshe.

Çuçi njofton se në Dhërmi vijon operacioni “Bregdeti Ynë” për shembjen e objekteve pa leje. Nisjen e fazës së dytë të operacionit ai e njoftoi në fillim të muajit shtator, ku po në Dhërmi u shemb me tritol një tjetër objekt pa leje. Ministri shprehet se ky nuk është një aksion, por një punë që do të vazhdojë kudo ku ka abuzim me ndërtimet.

“Vijon operacioni “Bregdeti Ynë” për shembjen e objekteve të radhës pa leje në Dhërmi. Ajo që nisëm në muajin qershor nuk ka për të qenë thjesht një aksion. Kush e ka menduar kështu, gabohet rëndë. Kjo është një punë që do të vazhdojë me vullnetin tonë të plotë për të mos toleruar askënd që zapton e ndërton ku të mundet. Nisi ky operacion në zonat bregdetare, por IKMT dhe Policia e Shtetit do të jenë kudo tjetër në territorin e vendit ku po tentohet apo janë ngritur objekte pa leje ose që janë në tejkalim të lejes së miratuar”, shprehet Ministri i Brendshëm.

Në fazën e parë të operacionit “Bregdeti Ynë” që nisi në muajin qershor u shembën mbi 130 ndërtime pa leje, u vendosën rreth 132 milionë lekë gjoba për 86 subjekte, si dhe u arrestuan e u ndoqën penalisht dhjetra persona.