Forcat xheniere kryejnë shpërthim të kontrolluar, ja çfarë u gjet brenda çantës së dyshimtë në Tiranë

Për më shumë se një orë punonjësit e policisë dhe banorët e rrugës “Mustafa Matohiti” në Tiranë, kanë qenë në ankth paraditen e sotme për shkak të një çante të dyshimtë e cila u gjet e braktisur.

Por mesa duket e gjithë situata ka qenë një alarm fals pasi brenda çantës që u hap nga forcat xheniere nuk u gjet asgjë e rrezikshme, ndërkohë që dyshohet se ajo është braktisur nga ndonjë qytetar.

Kanë qenë forcat xheniere që kanë ndërhyrë menjëherë pas njoftimit nga policia. Pas hapjes së kontrolluar të çantës, ka rezultuar se në të kishte disa rroba të bardha dhe sende të tjera personale.

Ende nuk dihet se kush e ka braktisur çantën në këtë zonë të populluar të Tiranës. Kanë qenë qytetarët që kanë pikasur çantën e braktisur ndërsa më pas policia ka rrethuar zonën duke krijuar një perimetër sigurie dhe duke mbajtur qytetarët larg deri në ardhjen e xhenierëve.