Leonard Rrasa ishte në kafe kur mori vesh se prindërit e tij kishin mbetur të vdekur. Më tronditës ishte edhe fakti, se autori i vrasjes së dyfishtë ishte babai i tij, Hekuran Rrasa, i cili pasi vrau bashkëshorten, Fëllënxa Rrasa, drejtoi armën edhe nga vetja e tij, duke mbetur i vdekur në vend. I tronditur nga krimi, i riu apelon për ndihmë.
“Isha në kafe. Më morën në telefon, më thanë kështu kështu…unë tani…kërkoj ndihmë nga Zoti, jam në mes të rrugëve,”- tregon ai dhe nis të qajë.
I riu tregon se ka qenë në kafe në momentin kur e kanë njoftuar për krimin që kishte ndodhur në familjen e tij, pasi të afërmit kishin dëgjuar të shtënat.
Pse ndodhi krimi
Në dëshminë e parë para grupit hetimor i biri është shprehur se “shkak i ngjarjes mund të ketë qenë një konflikt i çastit”, pasi nuk kishin debate.
Nga ana tjetër, vëllai i autorit të krimit nuk e përjashtoi mundësinë e konfliktit për shkak të situatës së rëndë ekonomike.
Hekuran Rrasa qëlloi fillimisht gruan e tij dhe më pas veten, ndërkohë që të afërmit thonë se nuk ka pasur probleme të shëndetit mendor, dhe së fundi punonte në Bashkinë e Divjakës në drejtorinë e mirëmbajtjes dhe pastrimit.
