Ditën e sotme ministrja e Shëndetësisë Ogerta Manastirliu, iu ka bërë apel të gjithë arsimtarëve, studentëve dhe pedagogëve nga qendra shëndetësore nr.4 në Tiranë, që të paraqiten në qendrën më të afërt të vaksinimit për të kryer vaksinën anti-C OVID19.
Ajo lajmëroi se ditën e hënë do të hyjë në fuqi urdhëri për paraqitjen e certifikatës së vaksinimit nga personeli arsimor në të gjitha shkollët e Shqipërisë.
“Duke filluar edhe nga dita e hënë, ne do të lëshojmë udhëzimin që do të ndiqet për të verifikuar ata që kanë kryer vaksinimin, duke filluar nga arsimtarët. Urdhri përmban të gjithë vendimet që ka marrë Komiteti Teknik i Ekspertëve, i cili përcakton që vetë institucionet shkollore, do duhet që të kontrollojnë nëpërmjet mekanizmave që do të ngrenë, të gjithë certifikatat e vaksinimit për personelin që do të jetë në shkolla dhe gjithashtu duke filluar nga data 11 tetor edhe për studentët”, u shpreh ajo.
Alternativa e mungesës së certifikatës së vaksinimit do të jetë testi i përjavshëm ose mësimi alternativ për studentët e pavaksinuar.
Ministrja e Shëndetësisë ka bërë më dije se interesi i shtuar në muajt e hapur të vaksinimit nga personeli arsimtarëve, e ka çuar në mbi 80% vaksinimin e tyre me një dozë dhe mbi 60% me dy doza, duke paraqitur mbulesë të lartë vaksinale.
