Tragjike në Itali! Shembet ndërtesa dy katëshe, vdes 4-vjeçari shqiptar

Një zhurmë e madhe dhe më pas një shpërthim i fuqishëm, ishte ajo që dëgjuan banorët e Torinos, para se të kuptonin se një ndërtesë dy katëshe ishte rrënuar tërësisht.

Mediat e huaja shkruajnë se në brendësi të ndërtesës gjendej një grua 34-vjeçare, me origjinë shqiptare së bashku me fëmijën e saj 4-vjeçar. E ëma ia ka dalë të shpëtojë e gjallë nga shpërthimi, mirëpo Aroni i vogël është ndarë nga jeta.

Shembja ndodhi para orës 9 të mëngjesit të sotëm dhe zhurma u dëgjua deri në rrethin Madonna di Campagna. Mësohet se shpërthimi erdhi si pasojë e një rrjedhje gazi. Ndërtesa kishte 6 apartamente dhe në të jetonin kryesisht familje me origjinë shqiptare dhe rumune.