Mbërrijnë në Shqipëri 121 afganët e parë/ Mes tyre gra dhe fëmijë

Ka mbërrtitur në Shqipëri, rreth orës 03:00 të mëngjesit të së premtes grupi i parë I afganëve që do të strehohen në vendin tonë.

Bëhet fjalë për 121 persona, aktivistë të shoqërisë civile, mes tyre dhe fëmijë si dhe 11 foshnja, të nisur nga Kabuli.

Avioni i tyre ka bërë fillimisht një ndalesë në kryeqytetin e Gjeorgjisë, Tbilisi, prej nga është nisur më pas rreth mesnatës drejt Tiranës.

Qytetarët afganë u pritën në aeroportin e Rinasit nga Ministrja për Europën dhe Punët e Jashtme Olta Xhaçka dhe Ambasadorja e SHBA-së në Shqipëri, Yuri Kim.

Xhaçka është shprehur e emocionuar për mbërritjen e qytetarëve afganë në vendin tonë. Ndërsa ka thënë se grupi i parë që mbërriti ditën e sotme, do të strehohen në një strukturë hoteliere në Durrës.

Mes të tjerash Xhaçka sqaroi se pasi të kalojë piku i sezonit e të çlirohen kapacitetet e strukturave hoteliere për pjesën tjetër, afganët e tjerë që do të vijnë në ditët në vijim do të strehohen për pak ditë në konviktet e QS.