Një ditë pas deklaratës së DASH, ka ardhur dhe reagimi i Partisë Demokratike dega Lazarat.
Në mesazhin e shpërndarë për mediat, kjo forcë politike kërkon verifikim të gjendjes së rendit në këtë fshat si dhe shprehin zhgënjimin e tyre për këtë deklaratë në vetvete dashakeqe për një zonë si Lazarati.
“Dje në mesditë ne si grup seksioni i partisë demokratike të fshatit Lazarat dëgjuam deklaratën e departamentit amerikan të shtetit mbi gjendjen e Covid-19 në Shqipëri po ashtu edhe gjendja e krimit në vend. Të zhgënjyer dëgjuam që departamenti i shtetit këshillon qytetarët amerikan që të mos kalojnë në Lazarat dhe në rrethinat e tij.
Nuk kuptojmë se ku i ka marrë këto të dhëna departamenti i shtetit. Ne si degë e Partisë Demokratike të fshatit Lazarat ftojmë personelin e ambasadës amerikane për një vizitë në fshatin tonë dhe njëkohësisht për të verifikuar gjendjen e rendit në këtë fshat. Ne ju mirëpresim. Dhe mbas kësaj kërkojmë një deklaratë tjetër nga ana e ambasadës për gjendjen reale në këtë fshat”, thuhet në deklaratën e PD.
