LIGJET E BIZNESIT
Gledian Llatja në rolin e pastërtorit. Duket si një “nuse e re”, e cila pastron dhe merr pluhurat çdo ditë. Por, në realitet, ai ka kthyer në jetë një skemë të mirëfilltë kriminale. Nga ato që rëndojnë së tepërmi arkat e buxhetit të bashkisë.
BoldNews.al ka siguruar disa dokumente të tenderëve te kësaj bashkie, e cila bën çdo 3 muaj procedura për pastrimin e qytetit. Nuk janë tendera të hapur, po me negocim. Paratë jepen direkt te firma “Victoria Invest”. Nëse bashkitë e tjera bëjnë formalisht procedura tenderimi 1 apo 2-vjeçare, Llatja i bën çdo 3 muaj. I dërgon në llogari kësaj firme nga 200 mijë euro nëpërmjet Thesarit të Shtetit. Një procedurë tepër e dyshimtë, duke qenë se pastrimi është gangrenë në gjithë vendin. “Mafia” ka futur hundët thellë në këtë biznes, teksa individë të dyshimtë kontrollojnë këtë biznes të pisët, por fitimprurës.
Sipas dokumenteve që disponon BoldNews.al, Bashkia e Elbasanit ka finalizuar për të disatën herë procedurën e pastrimit të qytetit. Lekët janë xhiruar në një procedurë tepër të dyshimtë. Dokumenti i mësipërm është i fundit i një serie të gjatë pagesash për kompaninë “Victoria Invest”. Sipas dokumentit, Bashkia e Elbasanit kishte hapur procedurën “kryerja e shërbimit të pastrimit për qytetin e Elbasanit”. Fondi për këtë tender ka qenë rreth 200 mijë euro me TVSH. Fitues, pa garë është “Victoria Invest”. Po, po kjo firmë ka futur në arkat e saj disa muaj më parë shumën prej 21.194.182 lekë dhe shumën 19.024.476. Të gjitha shumat me negocim, pa tender të hapur.
Por, le të analizojmë procedurën e fundit, atë të fund gushtit. Bashkia ka hapur tenderin për pastrimin e qytetit. Sipas hulumtimeve të BoldNews.al në Agjencinë e Prokurimit Publik, është vetëm njoftimi i fituesit. Ka marrë pjesë vetëm “Victoria Invest”, me ofertë 20.653.916 lekë, ose sa 99% e fondit të akorduar. Dokumenti ka edhe disa emra zyrtarësh të Bashkisë së Elbasanit, ku është hartuar nga specialisti E.Sancco, e ka pranuar përgjegjësi O.Kokunja dhe është firmosur nga drejtori A.Muhametaj.
Ndërkohë, në fund nuk është firma e kryetarit të Bashkisë Elbasan, Gledian Llatja, por ai ka autorizuar nënkryetarin Irland Sinën. Ndoshta Llatja i druhet një hetimi të mundshëm nga prokuroria apo nga SPAK dhe ka urdhëruar vartësit që të veprojnë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Disa muaj më parë, Bashkia e Elbasanit ka bërë të njëjtën procedurë tenderimi “pastrimi i qytetit”. Sipas vëzhgimit të BoldNews.al, shuma e akorduar është e njëjtë, rreth 200 mijë euro. Gjithashtu edhe fituesi, “Victoria Invest”, e cila ka ofruar rreth 99 % të fondit të akorduar.
Sipas burimeve nga Bashkia e Elbasanit, prej disa kohësh ka filluar një “luftë” mes disa firmash për pastrimin e qytetit, me ankimime në APP dhe KPK, apo edhe me denoncime në prokurori. Mësohet se landfilli i Elbasanit ka luajtur një rol thelbësor në këto procedura, pasi është drejtpërdrejt i përfshirë./ boldnews.al
