Fotot që po bëjnë xhiron e botës/ Ushtarët mbajnë në krahë foshnjet afgane

Afganistani është kthyer këto ditë në epiqendrën e lajmeve kudo në botë.

Mediat më të njohura ndërkombëtare, i kanë kushtuar kronika të shumta situatës në të cilën ndodhet vendi islamik. Talebanët kanë në dorë pushtetin dhe do të instalojnë në vend regjimin e tyre sipas ligjit të sheriatit.

Nga ana tjetër, dhjetëra qytetarë kanë mbushur aeroportin e Kabulit me shpresën për t’u larguar nga vendi dhe për t’i shpëtuar ndëshkimit të talebanasve.

Në pamundësi për t’u larguar vetë nga Afganistani, qytetarët, shfaqen përgjatë gardhit me tela në aeroport, duke zgjatur bebet e tyre dhe dorëzuar atyre ushtarëve amerikanë. Në fotot e publikuara së fundmi, shihen ushtarët amerikanë teksa kujdesen për të vegjlit.

“Pjesëtarët e shërbimit ushtarak amerikan ngushëllojnë foshnjat në Aeroportin Ndërkombëtar ′′ Hamid Karzai ′′ në Kabul, Afganistan”, shkruhet në faqen zyrtare të ushtrisë amerikanëve.