Vijojnë të dalin detaje të reja nga aksidenti tragjik i ndodhur këtë pasdite në Qafë-Muzinë.
Mësohet se kanë humbur jetën katër persona, ndërsa sipas dyshimeve ka ende pasagjerë të plagosur dhe të bllokuar brenda furgonit, i cili ka përfunduar në greminë.
Policia ka mbërritur në vendin e ngjarjes dhe ka zbardhur skemën e aksidentit të tmerrshëm.
Dyshohet se mjeti tip furgon është përplasur me një Fuoristradë, që qarkullonte në kah të kundër të rrugës. Për të shmangur përplasjen, furgoni ka devijuar dhe ka dalë nga rruga, duke përfunduar kështu në greminë.
Fugroni është përplasur me një mjet tip “Land Rover”, që drejtohej nga një grua, e cila ka mbetur e lënduar, por që ndodhet në spital jashtë rrezikut për jetën.
Ndërkohë, sipas informacioneve thuhet se është ndërhyrë me sharrë elektrike për thyerjen e dyerve të furgonit, për nxjerrjen e viktimave dhe pasagjerëve të bllokuar.
Paraprakisht, bëhet e ditur se furgoni ka rënë në një greminë mbi 50 metrash dhe është përmbysur, duke vështirësuar nxjerrjen e viktimave dhe pasagjerëve të tjerë.
