LIGJET E BIZNESIT
Arrestohet një 47-vjeçar me detyrë inspektor i policisë kriminale në Tiranë.
Ai akuzohet për shpërdorim detyre dhe korrupsion.
Shërbimi i Çështjeve të Brendshme dhe Ankesat në Policinë e Shtetit ka njoftuar se në pranga është vendosur inspektori me iniciale L.V. bazuar në kallëzimin e bërë një person ditën e sotme me iniciale E.B.
Nga hetimet paraprake, punonjësi i policisë gjatë një periudhe kohore ka kryer veprime fiktive dhe kërkonte para në këmbim të favoreve në ndërtimet pa leje.
SHÇBA nuk sqaron raste konkrete lidhur me këtë arrestim por shton se hetimet po vijojnë për dokumentimin e plotë si dhe identifikimin e personave të tjerë që mund të jenë përfshirë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
NJOFTIMI I SHÇBA:
Drejtoria Rajonale e Shërbimit për Çështjet e Brendshme Tiranë në bashkëpunim me strukturat e luftës kundër korrupsionit në Drejtorinë Vendore të Policisë Tiranë, bazuar në kallëzimin e shtetasit E.B., në datë 25 gusht 2021, ndaloi Inspektor L.V., 47 vjeç, me detyrë Nd/Specialist i Policisë Kriminale pranë Komisariatit të Policisë Nr. 6 në Tiranë, për veprat penale të “Shpërdorimit të Detyrës” dhe “Korrupsionit Pasiv”, parashikuar nga nenet 248 dhe 259 të Kodit Penal.
Mbeshtetur në faktet dhe provat e administruara gjatë hetimeve paraprake të zhvilluara, punonjësi i Policisë, L.V., gjatë një periudhe kohore të vazhdueshme, ka kryer veprime aktive, në shpërdorim të funksionit të tij organik, duke kërkuar dhe marrë shuma monetare të paligjshme, në këmbim të premtimit për mosveprimin e strukturave policore për ndërprerjen e paligjshmërisë në fushën e ndërtimeve pa leje. Vazhdon puna investigative dhe procedurale në lidhje me dokumentimin, sqarimin e pozitës së tij, si dhe identifikimin e personave të tjerë të mundshëm të përfshirë në këtë veprimtari.
Materialet procedurale në lidhje me veprimtarinë kriminale të kryer nga shtetasi i ndaluar i kaluan Prokurorisë pranë Gjykatës së Shkallës së Parë Tiranë.
