Aksident në autostradën Fushë Krujë-Milot/ Tre vajza në gjendje të rëndë për jetën

Tre vajza me origjinë nga Kosova kanë mbetur të plagosura mëngjesin e kësaj të marte në aksin rrugor Fushë Krujë-Milot, si pasojë e një aksidenti.

Vajzat, identitetet e të cilave nuk dihen ende,  kishin ardhur në Shqipëri për pushime. Ata ndodheshin në mjetin tip ‘Benz’, teksa u përplasën nga një makinë tjetër, po e markës ‘Benz’.

Edhe personat që ndodheshin në mjetin tjetër me targa të Kosovës pësuan lëndime, mirëpo gjendja e tre të rejave duket më e rëndë.

Bëhet me dije se një prej tyre me shpejtësi të madhe bëri një parakalim të gabuar. 2 makinat me drejtues shtetasin me iniciale A. Sh. dhe F. K janë përplasur dhe për pasojë janë plagosur pasagjerët me iniciale A. R., 20 vjeçe, Xh. Sh., 30 vjeçe dhe M. M., 23 vjeçe.

Të rejat janë nisur me urgjencë drejt spitalit të Traumës në Tiranë.
Grupi hetimor po punon për zbardhjen e rrethanave të aksidentit.