“Viti shkollor do të nisë dy javë para” Ministrja e Arsimit zbulon arsyen e këtij vendimi

Ministrja e Arsimit Evis Kushi ka lajmëruar se viti shkollor do të nisë dy javë para datës zyrtare.

Sipas saj vendimi është marrë me qëllim që të rikuperohen të gjitha mangësitë nga mësimi online.

Por ky plan do të zbatohet në varësi të nevojave specifike që do të ketë çdo shkollë.

“Jemi të vetëdijshëm që ka pasur edhe mangësira në njohuri apo kompetenca të nxënësve. Për këtë arsye, në muajt e fundit kemi punuar intensivisht edhe me ekspertët e MASR dhe ASCAP për të hartuar një strategji se si t’i plotësojmë këto mangësi. Ne kemi vendosur që për vitin e ardhshëm 2021-2022, dy javë përpara datës zyrtare të fillimit të vitit shkollor, ne do të kemi mësimin plotësues në të gjitha shkollat tona. Ky do të jetë një plan fleksibël në varësi të nevojave specifike që ka çdo shkollë apo zyrë arsimore”, u shpreh Kushi.

Gjithashtu,  ndër të tjera Kushi ka theksuar se ndryshimet e mëdha që po pëson arsimi në Shqipëri janë të mëdha, si në teknologji dhe në mësimëdhënie.  Ajo tha se është bërë një punë mjaft e madhe për të afruar sitemin arsimor me atë të vendeve të zhvilluara.