Këshilli i ri Kombëtar, Basha: Jemi e vetmja shpresë, do luftojmë çdo ditë

Pas publikimit të listës fituese për emrat e këshillit kombëtar të PD, kreu i demokratëve Lulzim Basha në një reagim në facebook përshëndeti anëtarët.

Basha shkruan se të gjithë kanë besimin e demokratëve për t’u qëndruar pranë shqiptarëve, ndërsa shton se Këshilli do të jetë edhe më shumë i hapur për gratë.

“Mirënjohje për delegatët që në Kuvendin Kombëtar përfaqësuan demokratët anembanë Shqipërisë. Suksese Këshillit Kombëtar të përzgjedhur! Keni besimin e demokrateve dhe demokratëve dhe përgjegjësinë për të luftuar çdo ditë pranë qytetarëve, për shqetësimet e vogla dhe të mëdha të familjeve shqiptare, për të kapërcyer bashkarisht vështirësitë dhe për të qenë zëri i tyre përballë çdo padrejtësie.

Sfidat që kemi përpara janë te mëdha, por vullneti dhe vendosmëria jonë po ashtu. Këshilli i ri, i hapur për më shumë zonja dhe zonjusha, më shumë të rinj dhe të reja, do të jetë një urë bashkëpunimi me shoqërinë, për të ndërtuar së bashku një Platformë Qytetare për Demokracinë, sepse ne jemi e vetmja shpresë për shqiptarët që kërkojnë ndryshim,”-shkruan Basha.