E mistershme/ Shkoi me të dashurin në ishull, dallgët nxjerrin në breg trupin e 26-vjeçares

Një ngjarje e mistershme ndodhi në Greqi, ku dallgët e detit kanë nxjerrë në breg trupin e pajetë të një vajze 26-vjeçare.

Ngjarja e rëndë është regjistruar ditën e djeshme në zonën e Ligarias, në Folegandros. Autoritetet thanë se e reja kishte shkuar në Folegandros bashkë me të dashurin e saj, që rezulton i zhdukur. Referuar ekzaminimeve mjeko-ligjore, vajza ishte vrarë dhe më pas është hedhur në det.

Disa dëshmitarë që kishin parë ngjarjen, kanë pohuar se 26-vjeçarja ka dalë nga makina, ku mbante një çantë në dorë dhe më pas i është drejtuar zonës së plazhit.

Në dëshminë e familjarëve thuhet se dy të rinjtë shkuan së bashku për të bërë pushime në ishull dhe kishin ngritur një kamping për të qëndruar disa ditë në zonë.

Pas lajmit tragjik në lidhje me vdekjen e vajzës, familjarët e saj dhe të djalit janë të shokuar, teksa banorët e zonës janë mobilizuar për të gjetur të riun që shoqëronte 26-vjeçaren në ishull.