“Zgjedhjet nuk kanë përfunduar” Parlamenti e shkarkoi, Meta del në konferencë urgjente

Dy ditë pasi parlamenti e shkarkoi me 104 vota pro, presidenti Ilir Meta ka mbajtur konferencën e parë për shtyp.

Gjatë fjalës së tij Kreu i Shtetit tha se zgjedhjet e 25 prillit nuk kanë përfunduar dhe ftoi të priten me durim rezultatet e ankimimeve që janë bërë nga partitë politike.

Ai u shpreh gjithashtu se pas 25 prillit, tani kemi hyrë në një epoke të “pluralizmit politik parlamentar”.

“Përshëndetje, mirësevini në epokën e pluralizmit politik pas 25 prillit. Se e kam vënë re që jeni shumë të mërzitur natyrisht s’mendoj që ka shumë arsye kushdo për të qenë i lumtur por të paktën duhet të jemi të kënaqur që po kalojmë nga epoka e para 25 prillit e parlamentit monist në një epokë ose po rikthehemi në një epokë të pluralizmit politik parlamentar pavarësisht se zgjedhjet ende s’kanë përfunduar duhet të jemi të duruar sa të përfundojnë të gjithë proceset e ankimimit”, tha Meta.