“Tradhëtarë të PS” Rama paralajmëron ‘tërmet’ në administratë: Të çlirohemi nga parazitët dhe injorantët

Në fjalën e tij gjatë Kongresit të PS, kryeministri Edi Rama paralajmëroi pastrimin e administratës nga punësimet nepotike apo ato partiake.

Ai shtoi se të gjithë ‘parazitët’ e administratës do të largohen dhe sikur ky të jetë mandati i fundit i tyre qeverisës.

“Ne duhet ta ndajmë mendjen njëherë e mirë që po e deshëm vërtetë majën ku shqiptarët që na zgjodhëm për herë të tretë duhet ta shpëtojmë këtë vend nga punësimet në shtet jashtë kritereve dhe konkurrencës. Kjo ju takon të gjithëve ju që jemi këtu. Unë nuk kam asnjë motiv më të madh për të dhënë edhe më shumë nga vetja sesa ky.

I çlirimit të ministrive, bordeve nga tentakulat e interesave që mbrohen në emër të partisë që cënojnë dhe gërryejnë shtetin. Faleminderit për duartrokitjet por dua që të bindem gjatë rrugës se kjo për ju nuk është diçka e bukur për t’u thënë që ta dëgjojë populli, por vijë ndarëse mes të qenit socialist dhe tradhtar i PS.

Të mbështesim çlirimin nga parazitë, injorantë me mbulesa politike të falura nga njëri apo tjetri. Të falura nga PS. E bëjnë të duket flamurin e PS si leckat e gabit. Për këtë pastrim duhet të hapemi më fort dhe më gjërë se asnjëherë. Duhet të angazhohemi se ku janë më të mirët dhe më të devotshmit. Të hapim bordet për vajza dhe djem që janë shkolluar jashtë shtetit apo ekselentë në Shqipëri. Këta kur përplasen me injorantë dhe arrogantë kërkojnë një shteg për t’u larguar nga vendi. Gjatë mandatit të tretë duhet që të kryejmë një metamorfozë”, tha Rama.

“Mandati i tretë le të jetë edhe i fundit po të dojë nëse mandati i katërt do të varet nga arrogantët, parazitët dhe injorantët që futen nëpër zyrat e shtetit me shtytje, nxitje, garanci interesash, që nga deputetët, tek ministrat e deri tek nivelet e drejtorëve nëpër territore. Kur të dëgjoni kushërinjtë e mi që punojnë në administratë, hajdeni më kërkoni vend për kushërinjtë tuaj”, shtoi më tej Rama.