Nis votimi/ 75 mijë anëtarë zgjedhin sot kreun e ri të PD

Gati 75 mijë anëtarë të Partisë Demokratike do të votojnë sot, duke nisur nga ora 08:00 deri në orën 19:00 për të zgjedhur mes Lulzim Bashës, Agron Shehajn, Edit Harxhit dhe Fatbardh Kadillit, për kryetarin e partisë.

Sipas udhëzimit, ata duhet të zgjedhin vetëm 1 prej kandidatëve pasi vota e tyre do të jetë nul në të kundërt.

75 mijë anëtarët e PD do ti drejtohen 76 qendrave të votimit të ngritura në të gjithë vendin.

Në fletën e votimit, Fatbardh Kadilli është i renditur i pari, e pas tij Edith Harxhi, Agron Shehaj e Lulzim Basha.

Pas mbylljes së procesit të votimit në orën 19:00, do të nis dhe procesi i numërimit që do të bëhet në qendrave të votimit. Më pas procesverbalet do të mbërrijnë në selinë e blu rreth mëngjesit të së hënës ku pritet dhe shpallja e rezultatit se kush do të drejtojë PD.

Votën mund ta hedhin vetëm personat që kanë kartë anëtarësie. Të përjashtuar nga vota do të jenë demokratët që sipas kryetarit të Komisionit Zgjedhor në PD, Jemin Gjana kanë bërë fushatë haptas për kundërshtarët në zgjedhjet e 25 prillit, ndonëse ata rezultojnë anëtarë të PD.

Nga ana tjetër, do të lejohen që të votojnë ata që s’kanë emrin në lista, por kanë kartë anëtarësie.