“Fiks në të njëjtën orë, si 7 vite më parë” Artan Hoxha bën deklaratën e fortë për ekzekutimin e Artan Santos

Gazetari i njohur Artan Hoxha ka kujtuar sot vrasjen e 7 viteve më parë të bankierit Artan Santo.

Ky i fundit ishte asokohe bashkëpronar i një kompanie mediatike dhe drejtor i një banke të nivelit të dytë.

Me anë të një reagimi, Hoxha shkruan: “Fiks në të njëjtën orë, si 7 vite më parë…. Asgjë nuk ka ndryshuar nga ai mëngjes i nxehtë fund qershori… Tan Santo, nëse na sheh nga aty lart, të rrëmosh mbi atentatin tënd sot, se cilët ishin urdhëruesit,  organizatorët, ekzekutorët, apo ata që ndihmuan në fshehjen e gjurmëve, është po aq e rrezikshme sa para 7 vitesh…”.

Kujtojmë se Artan Santo u ekzekutua në një atentat mafioz në ish-Bllok dhe sot e kësaj dite nuk ka asnjë person të akuzuar.  Dosja deri më tani ishte në Prokurorinë e Tiranës, por së fundmi ajo ka kaluar në Prokurorinë e Posaçme, SPAK.

Santo u ekzekutua më 26 qershor të vitit 2014. Sapo ai zbriti nga makina për t’iu drejtuar zyrës në selinë qendrore të bankës që drejtonte, dy persona më motor ju afruan dhe e qëlluan për vdekje.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern