LIGJET E BIZNESIT
Enkeleda Kapedani do të përballet ditën e hënë me kërkesën e ILD-së për shkarkimin e saj, pas videove provokuese në Tik Tok.
Përballja mes palëve do të kryhet në Këshillin e Lartë Gjyqësor, ku më herët Kapedani ka dhënë sqarime në lidhje me mënyrën si rrodhën videot në rrjet.
Bëhet me dije se gjyqtarja mohon kategorikisht të ketë llogari në rrjete sociale, jo vetëm në “Facebook”, por edhe “Instagram” dhe “TikTok”.
“Videot janë personale të miat”, u shpreh gjyqtarja, teksa ka dhënë më tej ndihmë për inspektorët e ILD, mbi personat që mund ti kenë postuar.
“Ato mund t’i kenë hedhur fëmijët e mi, vajza dhe djali, njëri pesë dhe tjetri 7 vjeç”, këmbëngul gjyqtarja. Vendimi do të shqyrtohet në fillim të javës, bazuar në kërkesen për pezullimin e saj nga detyra.
Kapedani është gjyqtare prej vitesh dhe së fundmi është zgjedhur nga anëtarët e Gjykatës së Elbasanit edhe zëvendës kryetare.
Disa video të saj ishin kryefjalë e mediave dhe rrjeteve sociale javën e kaluar, teksa gjyqtarja shihej në video provokuese, edhe brenda zyrave ku ajo punonte.
