“Vetëdorëzohem me një kusht” I iku policisë me pranga në duar, flet nga arratia i riu që akuzohet për ekzekutimin e biznesmenit në Elbasan

Policia e Elbasanit ka shoqëruar 37-vjeçarin Mirjam Dedja, mbi të cilin bien dyshimet se mund të jetë i implikuar në vrasjen e Everest Cakës.

I riu është mbajtur më shumë se 36 orë në komisariat, edhe pse ka dhënë deklaratë ku rrëfen të gjithë alibinë dhe i tregon policisë së Elbasanit të gjithë itinerarin e asaj dite dhe këmbëngul se këto lëvizje mund të vërtetohen dhe me kamera sigurie.

Në përfundim të 36 orëve, Dedja më pas u arratis nga policia e Elbasanit.

Së fundmi, ai ka një apel për Policinë e Shtetit, Prokurorinë dhe çdo autoriteti të drejtësisë që të angazhohen seriozisht për të zbardhur ngjarjen pasi sipas tij kishte miqësi me Everest Ibrahim Cakën dhe ka ardhur nga Spanja për të ndihmuar vëllain e tij të ekstraduar dhe anëtarët e familjes.

“E kam pasur shok Everestin dhe kaq. Më kanë mbajtur 36 orë në polici. Ia kam thënë me detaje se ku kam qenë, kam qenë tek burgu se më është ekstraduar vëllai nga Italia. I thashë kam qenë në Myslym Shyr dhe nga aty kam qenë në Elbasan, nga Elbasani në Tiranë dhe aty jam takuar me një shokun tim.

Nuk kam lidhje me asnjë grup kriminal. I kam të gjithë shokë. Njerëzit që kanë konflikte me njëri-tjetrin nuk dua t’ia di fare se çfarë bëhet në Elbasan. Kam ardhur nga Spanja vetëm për vëllain tim sepse ka të drejtë t’i ulet dënimi me ligjin shqiptar sepse unë interesohem për familjen time. Vetëdorëzohem me kusht që të lirohem prap”, tha Mirjan Dedja në një intervistë për gazetaren e Top Channel Anila Hoxha.