Tentoi të shtypte me makinë punëtorin në Rrugën e Kombit, gjykata jep vendimin për 67 vjeçarin

Ditën e sotme gjykata e Lezhës ka dhënë masën e sigurisë “Arrest me burg” për Ded Doçin.

Tre ditë më parë 67 vjeçari nga Mirdita tentoi të vriste duke goditur me makinë Nazmi Halilën, punonjës i një firme mirëmbajtëse të Rrugës së Kombit.

Edhe sot në sallën e gjyqit, Ded Doçi ka pranuar para togave të zeza konfliktet që ka për tokën ku kalon rruga, duke pretenduar se është e vetja.

Kujtojmë se, tre ditë më parë 67 vjeçari për shkak të konflikteve për tokën ku kalon rruga, ka marrë makinën dhe ka përplasur punëtorin e firmës që e mirëmban aksin rrugor, duke i shkaktuar dëmtime të lehta.

Fatmirësisht, punëtori Nazmi Halila nuk ka marrë lëndime serioze dhe pas ndihmës mjekësore në spital, është larguar për në shtëpinë e tij.

Po ashtu, para Gjykatës së Lezhës Ded Doçi ka thënë se nuk ka tentuar të vriste punëtorin e firmës mirëmbajtjes të Rrugës së Kombit, i cili në fakt nuk kishte asnjë lidhje me “problemin” e 67 vjeçarit pasi ishte vetëm puëntor, por ngjarja ka qenë aksidentale.