S’ka qetësi në Vlorë/ Plagoset me 4 plum ba 38-vjeçari, subjekt i OFL-së

Një atentat i është bërë në derën e shtëpisë mbrëmjen e djeshme në Vlorë, Edison Begajt, subjekt i OFL.

38-vjeçari mori 4 plumba në këmbë në ambientet e banesës së tij në fshatin Kaninë, ndërsa autorët ende nuk janë identifikuar.

Nuk dihet ende shkaku i plagosjes së tij dhe pista kryesore qëndron trafiku i drogës, për të cilin është dënuar më parë, ndërkohë që ai paraqitet jashtë rrezikut për jetën.

Edison Begaj rezulton të jetë piketuar nga OFL në maj të 2020-ës për të treguar burimin e pasurisë së tij, pasi Gjykata e Apelit të Krimeve të Rënda Tiranë e ka dënuar me 7 vite e 6 muaj burgim, për veprat penale “Prodhimi dhe shitja e narkotikëve” dhe “Prodhimi dhe mbajtja pa leje e municioneve luftarake”.

Më 20 shkurt të vitit 2008, policia e Vlorës vuri në pranga shtatë persona, mes tyre edhe Begajn, duke i dhënë fund veprimtarisë 10-vjeçare kriminale të një bande e cila trafikonte drejt Italisë drogë dhe armë.

Ndërhyrja e dhjetëra punonjësve policorë të Vlorës dhe të Forcave të Ndërhyrjes së Shpejtë çoi në bllokimin dhe sekuestrimin e 284 kilogramëve hashash të ndara në tetë pako të mëdha, në fshatin Ndërmenas të Fierit. Droga u gjet në një furgon, në të cilin gjatë kontrollit u zbuluan 5 armë zjarri automatike, një pistoletë dhe një sasi e konsiderueshme fishekësh dhe granatash. Në atë kohë, policia tha se armët e sekuestruara ishin destinuar për grupet kriminale italiane.