LIGJET E BIZNESIT
Spartak Ngjela ka kaluar disa vite të jetës së tij në burgun e Burrelit dhe te Ola rrëfeu për këtë periudhë të vështirë.
Teksa ai tregonte ra në sy karakteri i fortë që avokati ka, aq sa për një periudhë kaq të errët foli si për diçka normale, madje dhe me nota humori.
Për rreth 5 vite ka qenë në të njëjtën dhomë burgu me të atin. Ai tha se në fillim Kiço Ngjela ka qenë 3 vite në burgun e Tiranës, dhe pasi vdiq Mehmet Shehu e transferuan në Burrel ku ndodhej avokati. Babai i tij ishte moshë e madhe, ndaj ai duhej të kujdesej për të.
Avokati rrëfeu se debatonte vazhdimisht me të atin pasi kishin bindje politike të ndryshme. Debatet mes tyre në dhomën e burgut sigurisht që regjistroheshin. Sipas avokatit, kur Ramiz Alia kërkonte materiale dhe nuk kishin çfarë t’i jepnin, zbardhnin debatet që ai bënte me babanë e tij dhe ia çonin.
Gjatë bisedës u zbulua se në burg avokati në atë kohë ka patur edhe të vëllanë, gjithashtu i dënuar për arsye politike. Ngjela theksoi se ata karakterizoheshin nga optimizmi dhe se nëse do ta duhej ta krahasonte me muzikën ata ishin gjithmonë rrok.
Vëllezërit korçarë teksa dëgjuan historinë prekëse të avokatit u frymëzuan për të kënduar një këngë të cilën ia dedikuan atij dhe të gjithë atyre që fatkeqësisht kanë kaluar një pjesë të jetës së tyre në burgjet e diktaturës.
Por ndërkohë Spartak Ngjela është sigurisht shumë filozofik kur flet për dashurinë dhe e cilësoi atë si mobilitet permanent.
Sipas avokatit, mashkulli përjeton disa dashuri platonike para se të dojë vërtet një grua, ndryshe nga këto të fundit. Ai zbuloi se dashurinë e parë e ka përjetuar në moshën 17-vjeçare.
Avokati me kënaqësi rrëfeu një episod që i kishte ndodhur në vitin e 3-të në universitet me një nga vajzat më të bukura të asaj kohe. Atij i kishte mbetur në mendje përgjigja që kishte marrë prej saj.
“Më tërhoqe si magnet”, ishte komplimenti që Ngjela kishte menduar për të, ndërsa përgjigja e saj ishte “Magneti nuk tërhiqet nga dërrasat”. Ngjela nuk u dorëzua po shtoi, “Dërrasa ka diku një gozhdë” dhe vajza nuk e mbajti dot gazin.
(BalkanWeb)
