Me shishe plastike nga njëri cep i botës në tjetrin! I riu në qendër të vëmendjes së mediave ndërkombëtare! 

Imazhi i një të riu i cili ka përdorur shishe plastike për ta ndihmuar të notojë dhe të arrijë në brigjet e Spanjës, ka kthyer edhe njëherë në vëmendje dramën me të cilën po përballen emigrantët çdo ditë.

I riu u pikas nga ushtarët në plazhin El Tarajal përpara se të përpiqej të kalonte murin për të hyrë në qytet.

Ushtari që kapi djalin, njoftoi se i riu nuk kishte një familje në Marok dhe preferonte të vdiste përpara se të pranonte të kthehej në vendlindje.

Duke qarë me dënesë, ai u shoqërua në zonën e sigurisë midis dy vendeve, bashkë me emigrantët e tjerë.

“Ai nuk donte të kthehej. Nuk kishte familje në Marok, nuk i interesonte nëse do të vdiste nga i ftohti. Ai preferoi  të vdiste, sesa të kthehej në Marok,” – u shpreh ushtari i cili kapi  djalin në bregdet.

“Unë kurrë nuk kam dëgjuar diçka të tillë nga dikush kaq i ri,” – shtoi ushtari.