I shpëtoi tragjedisë nga përqafimi i të atit, mjekët flasin për shëndetin e 5-vjeçarit

Mjekët në Itali kanë nisur të zgjojnë nga koma Eitanin 5-vjeçar, i cili është i mbijetuari i vetëm i tragjedisë së ndodhur në Itali.

Vogëlushi ndodhet në një spital në Torino pasi teleferiku në të cilin ai ndodhej me familjarët e tij u rrëzua duke u marrë jetën 14 njerëzve.

Tanimë, mjekët janë optimistë se gjendja e tij mund të përmirësohet teksa kanë nisur procesin e zgjimit pasi fëmija kaloi një natë të qetë.

“Po i reduktojmë dozën e medikamenteve që e kanë mbajtur më gjumë deri më tani,” u shprehën mjekët që po kujdesen për të.

Mjekët e spitalit “Regina Margherita” u shprehën se fëmija është përgjigjur mirë ndaj mjekimit dhe se rezonanca magnetike që iu bë nuk tregoi aspak dëme neurologjike.

Eitan Biran dyshohet të ketë shpëtuar nga përqafimi i i të atit që e mbuloi me trupin e tij në momentin që teleferiku po rrëzohej.