Hodhën gaz lotsjellës në Kuvend, deputetët i shpëtojnë akuzës së “arm ëmbajtjes pa leje”

Gjykata e Prishtinës ka shpallur të pafajshëm për akuzën e armëmbajtjes pa leje deputetët si dhe ish-deputetët e Lëvizjes Vetëvendosje. Ata kundërshtuan marrëveshjen e demarkacionit kufitar me Malin e Zi në vitin 2016, duke hedhur gaz lotsjellës në sallën e seancave plenare të Kuvendit të Kosovës.

Akuza për “armëmbajtje pa leje” u ngrit ndaj Albulena Haxhiut ministres së Drejtësisë,  deputetit Pal Lekaj si dhe ish-deputetëve Donika Kadaj-Bujupi dhe Besa Baftiu të cilët akuzoheshin për rastin e hedhjes së gazit lotsjellës në Kuvendin e Kosovës.

Ata u liruan nga akuzat në mungesë të provave. Sipas gjykatës, nga administrimi i provave materiale e konkretisht vërtetimi mbi kthimin e sendeve, dokumentacioni si dhe vërtetimi mbi sekuestrimin e sendeve, gjykata vlerëson se nuk mund të vërtetohet se të pandehurit kanë kryer vepër penale, pasi nuk ka asnjë ekspertizë që mund të vërtetojë faktin se sendet e sekuestruara nuk mund të ishin armë në pajtim me ligjin për armët.

Po ashtu, sipas gjykatëses, edhe nga vërtetimi mbi kthimin e sendit gjykata konsideron se po të ishin armë ashtu sikurse pretendon prokuroria, të njëjtat nuk do të ishin kthyer tek i pandehuri Lekaj.

Sipas aktakuzës së ngritur në datën 8 prill 2016, Lekaj, Baftiu, Kadaj-Bujupi dhe Haxhiu akuzohen se kishin poseduar gombola të gazit lotsjellës pa autorizim.

Në aktakuzë thuhet se në datën 19 shkurt 2016, rreth orës 12:20, në hollin e Kuvendit e Kosovës, pas pauzës së punimeve të Kuvendit, teksa të akuzuarit ishin duke u kthyer në sallë, gjatë kontrollit nga ana e punëtorëve të sigurimit të Kuvendit, tek të akuzuarit ishin gjetur dhe sekuestruar nga një bombole e gazit lotsjellës, të cilën e mbanin pa autorizim.