Forcat Speciale RENEA dhe FNSH operacion blic në Nikël, çfarë po ndodh? Ka disa persona të shoqëruar

Forcat Speciale RENEA dhe FNSH po zhvillojnë një operacion blic në zonën e Niklës, në Fushë Krujë. Bëhet me dije se në ndihmë të Forcave RENEA, kanë shkuar dhe Forcat e Ndërhyrjes së Shpejt nga Tirana dhe Fieri.

Mësohet se nga operacioni janë shoqëruar 5 persona ndërsa identiteti i tyre nuk bëhet me dije ende.

Ndërkohë, si pasojë e rëndësisë së lartë të operacionit, ai po drejtohet nga Drejtoria e Përgjithshme e Policisë së Shtetit në Tiranë.

Përmendim faktin se zona e Niklës ka qenë disa herë në fokusin e operacioneve të Forcave Speciale pasi pikërisht në këtë vend ka disa grupe kriminale që veprojnë në vendin tonë.

Në fokus të operacionit është goditja e veprimatarisë kriminale në fushën e narkotikëve. Sera, magazina të shumta, objekte të braktisura dhe terrene të pyllëzuara janë duke u kontrolluar imtësisht nga Forcat Speciale.

Operacioni po ndiqet nga afër nga drejtuesi më i lartë i Policisë së Shtetit Ardi Veliu bashkë me Tonin Vocajn dhe Gjovalin Lokën.