LIGJET E BIZNESIT
Këngëtarja shqiptare Anxhela Peristeri ka perfomuar e dyta në finalen e madhe të “Eurovision Song Contest 2021” me këngën “Karma”.
Festivali i këngës, në kontinentin europian, po transmetohet ‘live’ nga skena e “Rotterdam Ahoy”, në Holandë.
Gara u hap nga Qipro ndërsa 26 vende garojnë për çmimin e madh. Në faqen zyrtare të Eurosong, janë publikuar shumë sondazhe nga artistë të ndryshëm, si dhe poll-et nga publiku.
Një nga producentët më të njohur amerikanë, Brian Malouf i cili ka punuar me Michael Jackson, Madonna-n, Selena Gomez, Miley Cyrus dhe artistë të tjerë me famë botërore ka dëgjuar të gjithë finalistët dhe ka dhënë vlerësimin e tij profesional.
TOP 10-shja e tij kryesohet nga Shqipëria.
“Kënga është përrallore, produksioni është përrallor, e dua! Do të më pëlqente ta dëgjoja në një duet me Andrea Bocellin. Një vokal i shkëlqyer, produksion i shkëlqyer dhe një këngë shumë e mirë!”, shkruan Malouf për “Karma-n”.
Ndërsa Zvicrën, që përfaqësohet nga këngëtari shqiptar, Gjon Tear’s me këngën “Tout l’Univers” e vendos në vendin e tretë. “Melodi shumë aventureske, kënduar nga një tenor i bukur, ‘felsetto’ e fortë”, shkruan producenti i njohur.
Ndërkohë, shqiptarët që jetojnë jashtë Shqipërisë mund të votojnë sonte, në numrin e shtetit ku ndodhen, me kodin 02, në momentin që fillon votimi, i cili do të njoftohet përgjatë spektaklit dhe numrat e telefonave do t’ju shfaqen në ekran!
Nga një telefon mund të votohet deri në 20 herë.
