“Ti harrojë lekët” Rama bën deklaratën e fortë për Becchettin: Do paguajë dëmet që u ka sjellë shqiptarëve

Kryeministri Edi Rama mbrëmjen e sotme nuk ka lënë pa prekur edhe temën aq të shumëpërfolur të gjyqit të humbur mes Shqipërisë dhe biznesmenit italian Francesco Becchetti.

Si pasojë e një vendimi, vendi ynë i detyrohet atij 110 milionë euro.

Në programin “Të paekspozuarit”, kreu i qeverisë deklaroi përballë gazetarit Ylli Rakipi, se nuk do të marrë asnjë euro nga buxheti i shtetit, madje shtoi se biznesmeni do u paguajë një nga një dëmet që u ka sjellë shqiptarëve.

“Ai do paguajë një për një dëmet që u ka sjellë shqiptarëve. Dhe jo do i paguajë në rrugë mediatike, por në rrugë gjyqësore. Unë jam nga ata që kur them çfarë nuk do lejoj të ndodhë, këtë nuk e luan topi. Nuk e them dot këtu si do e bëj këtë. Është strategji e skuadrës që do ta bëjë këtë punë. 110 milionë eurot e shqiptarëve, marifetçiu i paskrupullt t’i harrojë, ndërsa dëmet që i ka bërë Shqipërisë do i paguajë një për një.

Ajo ishte një ndërmarrje që u rekrutuan gazetarë me rroga marramendëse. Ai do marrë nga ato 110 milionë euro, aq sa mund të marrë ky televizioni juaj nga fondi i CNN. Kjo nuk ka mbaruar dhe surpriza për të do të jetë shumë e madhe. Ai është i kërkuar për pastrim parash”, tha Rama gjatë fjalës së tij.