Të afërm me kandidatin e LSI/ Policia jep detaje nga plagosja e 2 të rinjve në Tiranë, në kërkim autorët

Dalin detaje nga plagosja e dy të rinjve në zonën e Saukut në Tiranë.

Në një njoftim zyrtar, policia ka bërë me dije se njëri prej tyre është në gjendje të rëndë shëndetësore.

Të dy të plagosurit janë të afërm të një kandidati për deputet të LSI.

Ata janë identifikuar si Roland dhe Oltjan Doka, të afërm me kandidatin e LSI Klodian Doka.

Mësohet se janë shpallur në kërkim tre autorët e ngjarjes me iniciale E. S., 26 vjeç, A. M., 25 vjeç dhe S. K., 34 vjeç.

Policia po punon për kapjen e tyre, ndërkohë që deri tani dihet se janë larguar me dy automjete të ndryshme, të tipit “Benz” dhe “Audi”.

NJOFTIMI ZYRTAR I POLICISE:

Më datë 17.04.2021, u referuan materialet në Prokurorinë pranë Gjykatës së Shkallës Parë Tiranë dhe punohet për kapjen e shtetasve të shpallur në kërkim E. S., 26 vjeç, A. M., 25 vjeç dhe S. K., 34 vjeç, pasi në rrugën “Selim Braja” në  Sauk të Vjetër,  janë konfliktuar për  motive të dobëta  me shtetasit K. D., 30 vjeç, E. D., 23 vjeç dhe R. D., 27 vjeç (vëllezër).

Si pasojë e konfliktit janë dëmtuar lehtë me sende të  forta  shtetasit K. D dhe E. D, si dhe është dëmtuar  me mjet prerës shtetasi R. D, i cili ndodhet në spital, jashtë rrezikut për jetën. Në vijim të veprimeve u procedua në gjendje të lirë shtetasi B. H., 36 vjeç, pasi ka kanosur shtetasin K. D.

Punohet për kapjen dhe shoqërimin e 3 shtetasve të shpallur në kërkim.